Nú er.... Fjör í Flóanum

26.05.2011 07:32

Vorhátíð

Okkur hjónum var boðið á vorhátíð í gær. Það voru barnabörnin okkar sem eru í leikskólanum "Krakkaborg" hér í sveit sem buðu okkur á Vorhátíð Krakkaborgar. Sérstaklega bauð hún Aldís í Jaðarkoti okkur, en á hátiðinni útskrifaðist hún úr leikskólanum. Hún er sem kunnugt er að fara að hefja nám við Flóaskóla næsta haust og sannarlega um stóran áfanga hjá henni að ræða.

Dagskrá hátíðarinnar var bæði metnaðarfull og krefjandi. Hjalti Geir í Lyngholti og Aldís sungu með kór skólans "Regnbogakórnum" og léku undir á trommur. Arnór í Jaðarkoti lék í leikritinu "Lúlli fær heimsókn" ásamt börnunum sem eru með honum á deild í leikskólanum. Kolbrún Katla í Lyngholti sem er nú fyrir löngu síðan hætt í leikskóla tók einnig þátt í dagskránni. Nokkrir fyrrverandi nemedur leikskólans og núverandi nemendur í Tónlistaskólanum spiluðu á hljóðfæri í upphafi hátiðarinnar.

Ég er sannfærður um að í leikskólanum er verið að vinna mjög gott starf. Þar er öflugt starfsfólk sem hefur metnað fyrir því sem það er að gera.

Skrifað af as

21.05.2011 07:35

Vorhret

Það andar köldu þessa dagana. Gróðri fer ekkert fram og sumarið lætur bíða eftir sér. Víða um land eru bændur að fást við allt lambfé enn á húsi. Það er slydda eða jafnvel snjókoma sumstaðar og færð spillist.

Hér í Flóanum er þetta reyndar ekki svona slæmt. Vissulega er kalt og gróður er í engri framför. Það væsir samt ekkert um lamféð úti og grasið var orðið það mikið að nóg er að bíta. Það er reyndar bölvað rok en þó Flóinn sé flatur má víða finna einhvert skjól fyrir noðangarranum. emoticon

Það sem ég held að helst valdi tjóni hér er þurkurinn. Hann fer ekki vel með flög sem eru í vinnslu og ekki búið að sá í og valtra. Rakinn í yfirborðinu sem er fræunum nauðsynlegum til þess að spíra tapast allveg. Ef vorið og sumarið verður eins þurrt og síðustu sumur getur það skipt sköpum að sá í rakann og nýunnin jarðveginn.

Það þarf ekki að koma á óvart að það geri einhvert vorhret. Þetta er ekki fyrsta skipti sem það kemur fyrir. Ég held nú reyndar að það sé frekar algengara en hitt. Það er bara misjafnt hvað það er mikið og stendur lengi yfir. Alltaf gengur það yfir og það kemur sumar aftur. emoticon

Það er ólán þegar vorhretið hrekkur ofaní kok á manni með tilheyrandi hálsbólgu og kvefi. Það gekk nú svo til með mig að þessu sinni. Það svo að á tímabili missti ég allveg röddina. Ekki held ég að það hafi neitt verið til skaða og engan vegin víst að ég hefði sagt neitt að vita á meðan á því stóð.

Jón í Lyngholti reyndi að halda uppi samræðum við mig á miðvikudagskvöldið en varð frá að hverfa. Nú er röddin að koma aftur og ég hef trú á að við Jón eigum eftir að spjalla saman í framtíðinni. emoticon

Skrifað af as

13.05.2011 23:13

Þúsund tonn af skít.

Verð á áburði hefur margfaldast nú á nokkrum árum. Við sem byggum afkomu okkar á heyskap og öðrum jarðargróða förum ekki varhluta af þeirri staðreynd. emoticon

Þetta hefur leitt til þess að nú leita menn allra leiða til þess að nýta þau áburðarefni sem eru í skítnum betur. Það er reyndar ekki svo að það kosti ekki neitt að bera skít á tún og í akra en með hækkandi áburðarverði borgar það sig að leggja meira í þann þátt ef það er til þess að ná betri nýtingu og spara kaup innfluttum áburði.

Ekki dugar að ætla sér að fá uppskeru af jörðinni án þess að sjá henni fyrir þeim næringarefnum sem hún þarf. Annað kemur manni strax í koll og í verstafalli myndi flokkast sem rányrkja.

Vandamálin við ná góðri nýtingu á kúskít á túnin hefur helst verið að oft er annmörkum háð að koma honum út á þeim tíma sem best hentar. Sum vor hefur það einfaldlega alls ekki verið hægt. Það er tímafrek vinna að keyra fleiri hundruð tonn af mykju út og dagarnir til þess á vorin ekki alltaf margir.

Annað atriði sem einnig hefur verið til vandræða er að ef ekki rignir strax eða allavega fljótlega á nýáborinn skítinn þornar hann á túnunum og skrælnar. Hann gengur ekki niður í jarðveginn heldur fer saman við heyin þegar heyjað er. Slíkt hey er ekki lystugt og étst ekki.

Búnaðarfélögin hér í Flóanum eru aðilar að Skarna ehf sem er hlutafélag sem á og rekur stóran haugtank með niðurfellingarútbúnaði. Í veiðleitni okkar að ná meiri verðmætum úr fjóshaugnum höfum við fengið þetta verkfæri í vinnu til okkar nokkrum sinnum.

Hann Davíð var mættur hérna um miðjan dag í gær og tók til við að keyra úr haughúsinu. Þegar verkinu var lokið nú í dag var búið að taka úr haughúsinum rúmlega 1000 tonn af skít og fella niður í u.þ.b 55 ha af túnum.

Skrifað af as

06.05.2011 21:46

Folald

Vorið er skemmtilegur tími. emoticon

Maður bíður allan veturinn eftir því og hlakkar til að takast á við vorverkin. Samt er það alltaf svo að þegar vorið brestur á virðist tíminn alltaf allt of knappur. Maður fyllist örvæntingu um að allt sem maður vill og þarf að gera strax komist ekki í verk nógu tímalega. emoticon

Þessa dagana er allt kapp lagt á að vinna þá akra sem ætlunin er að sá korni í. Hér er hugmyndin að sá grasfræi í hluta akranna með bygginu. Nauðsynlegt er því að jafna endanlega í flaginu og ganga þannig frá að úr geti orðið góð tún.

Þessi vinna hvílir nú kannski ekki mikið á mínum herðun nú orðið. Það er aðallega Sigmar sem sér um þetta. Kristinn tengdasonur hefur einnig verið drjúgur í þessum með honum þegar hefðbundum vinnudegi er lokið hjá honum. Sjálfur reyni ég að komast í þetta með þeim þegar færi gefst. Tók i vikunni, suma dagana, nokkra klukkutíma á jarðýtunni. emoticon

Sauðburður er einnig hafinn. Sú fyrsta bar á miðvikudagskvöldið. Seinna sama kvöld þegar ég var að kom heim af sveitarstjórnarfundi rétt eftir miðnætti voru tvær í viðbót að byrja að bera. Eitthvað gekk það ekki nógu vel en með minni hjálp eru nú hér komin þrjú lifandi lömb undan þrem ám. Ég vonast til að ég fá nú fleiri lömb til nytja eftir hverja á en þetta þegar upp er staðið.

Í dag kastaði svo gráa merin hennar Erlu Björg, hún Pandóra og kom með brúnt hestfolald.

Það er nú orðið ansi langt síðan hér hafa fæðst folöld og tilhlökkun var mikil. Sjálfur var ég á Héraðsnefndarfundi í morgun þegar merin kastaði en Kolbrún tók þessar myndir af hestinum nokkurra mínútna gömlum.

Börnin í Jaðarkoti og Lyngholti hafa svo í dag komið að heilsa upp á nýjasta gæðingsefnið á bænum.

Skrifað af as