Nú er bjartasti tími ársins. Nóttin er björt og veðrið undanfarna daga hefur einkennst að mikilli blíðu. Ég mæli með því að hluti af svona nóttum sé tekin í útreiðar. Ég held að tvegga tíma útreiðartúr á þessu  tíma jafnist á við fjögurra tíma svefn.

Þórarinn bróðir sem býr í Hafnafirði  kom hér í gærkvöldi og gerðum við það eina gáfulega í stöðunni. Við ásamt Jóni í Lyngholti lögðum á gæðingana og riðum út í kvöldblíðunni í Flóanum. 

Við létum auðvita besta og viljugasta hrossið undir gestinn.  Fyrir rúmlega þrjátíu árum þegar við Þórarinn vorum báðir ennþá yngri en við erum núna keyptum við sitt hvort merfolaldið frá Laugardælum. Þórarinn vann sem  fjósamaður í Laugardælum á sumrin þegar hann var í menntaskóla. Eitthvað fór hann á hestbak á þessum árum og fékk áhuga á að rækta hross. Með það í huga gekkst hann fyrir því að við keyptum þessi folöld haustið 1978.
 
Undan annarri þessarri meri hafa fæðst hér nokkur folöld í gegnum tíðina. Þessi hryssa sem Þórainn fékk svo  lánaða hér  í gærkvöldi er síðan út af henni komin og einnig grárri hryssu sem hann átti hér áður fyrr.  Það má því sega að nú fyrst hafi hann nýtt sér afrakstus þeirra rætkunnar sem hann lagði grunn að fyrir 32 árum síðan. 

Þó Þórarinn sé kannski ekki allveg í toppþjálfun sem knapi þessi misserin gaf hann okkur Jóni ekkert eftir í útreiðunum. Eftir rúmlega tvegga tíma útreiðatúr hvaddi hann okkur aftur og hélt endurnærður aftur í Hafnafjörðinn. Aðspurður sagðist hann ekki hafa neina trú á því að hann yrði með harðsperrur í dag....

Í gær var þjóðhátíðardagur Íslendinga. Það er full ástæða til þess að fagna fullveldi Íslands og halda hátíðlegan sérstakan þjóðhátíðardag. Það er vonandi að íslendingar geri sér líka grein fyrir því hvers virði það er að vera fullvalda þjóð og í hverju það fellst.

Haft var eftir utanríkisráðherranum að hann taldi daginn í gær "heilla dag fyrir Ísland" þar sem Evrópusambandið var að samþykkja að hefja aðildarviðræður við Íslendinga. Það kom svo sem engum á óvart að það skyldi vera samþykkt. Aðildarviðræðurnar ganga svo út á það hvernig og með hvaða hætti Íslendingar ætla að laga sig að ESB og hvaða skilyrði önnur evrópuríki ætla að setja okkur.

Ljóst er að áhugi ríkja innan Evrópu á að fá Ísland inn í sambandið er ekki vegna þess að hér sé svo áhugaverður markaður. Áhugi þeirra beinist fyrst og framst að þeim auðlindum og tækifærum sem hér eru. Þetta eru m.a.fiskimiðin okkar, orkan í fallvötnunum og jarðhitanum og mikið af lítið notuðu landi. Landrými þetta getur bæði verið áhugvert vegna möguleika á aukinni ræktun eða annarri landnotkunn og einnig sem ósnortin náttúra.

Það er mér algerlaga óskiljanlegt afhverju íslensk stjórnvöld eru að leggja upp í þann leiðangur að sækja um aðild að þessu Evrópusambandi. Ég held að möguleikar okkar séu mikið vænlegri utan þess. Við verðun bara að læra og nenna að nýta okkur þau tækifæri og þá þekkingu sem hér eru fyrir hendi. 

Við erum ekki góð í alþjóðlegum bankarekstri eða öðrum slíkum hlutum. Það er búið að reyna það. Einbeitum okkur frekað að því sem við kunnum og eflum þekkingu á þeim hlutum. Ef við ætlum að hasla okkur völl á nýjum sviðum gerum það þá með þeim hætti að við vitum hvað við erum að gera
.

Hér í Flóanum var þjóðhátíðardagurinn haldinn hátiðlegur með hefðbundum hætti. Að venju varði ég hluta úr deginum við hátíðarhöld í og við Þjórsárver. Umf. Vaka stóð fyrir íþróttamóti barna á íþróttavellinum og  Kvennfélag Villingaholtshrepps stóð fyrir reiptogi  og pokahlaupi. Fallkonan flutti sitt ávarp og gestir hátiðarinnar gæddu sér á þeim veisluföngum sem boðið var upp á.








Mér fannst skemmtilegt að fyljast með m.a. barnabörnum mínum taka þátt íþróttakeppninni. 17 júní mót umf. Vöku hefur verið haldið í áratugi og hafa margir byrjað sinn íþróttaferil á einmitt þessu móti. Meðal áhorfenda var fólk sem fyrir einhverjum árum síðan hafði keppt á þessu móti og seinna fylgst með börnum sínum keppa en voru nú að aðstoða og hvetja barnabörnin sín.

Ný kjörin sveitarstjórn Flóahrepps kom saman til fundar í gærkvöldi í fyrsta skipti. Aðalverkefni fundarins var að kjósa í embætti, nefndir og fulltrúa Flóahrepps hjá hinum ýmsu stofnunum og samstarfsverkefnum.

Ég var kjörinn oddviti með öllum 5 atkvæðum sveitarstjórnarmanna og þakka ég það mikla traust sem mér er sýnt með því. Árni Eiríksson á Skúfslæk var kjörinn varaoddviti. Formaður fræðslunefndar var kjörinn Elín Höskuldsdóttir á Galtastöðum og formaður atvinnu- og umhverfisnefndar var kjörinn Heimir Rafn Bjarkason í Brandshúsum

Atvinnu- og umhverfisnefnd er ný nefnd hjá sveitarfélaginu. Hún verður til með sameiningu á Umhverfisnefnd og Atvinnu- og ferðamálanefnd, auk þess sem henni er ætlað að taka að sér samgöngumál sem á síðasta kjörtímabili heyrði beint undir sveitarstjórn.

Á fundinum í gær var einnig samþykkt að ráða Margréti Sigurðardóttir áfram sem sveitarstjóra næstu fjögur árin. Það er mikill fengur fyrir sveitarfélagið að njóta hennar starfa áfram. Það er einnig mikill sparnaður á tíma og peningum að þurfa ekki að fara í það verkefni að finna nýjan sveitarstjóra og koma honum inn í starfið eins og mörg sveitarfélög standa í núna um þessar mundir.

Ég er mjög ánægur með þann áhuga sem mér finnst fólk almennt hafa á því að vinna fyrir sveitarfélagið. Ég hef undanfarna dag rætt við fjölda fólks um að taka að sér að starfa í nefndum fyrir sveitarfélagið og fengið góðar viðtökur. 

Það er loksins farið að rigna. Þetta er kærkomin rigning en það sem af er þessu sumri og í allt vor hefur verið mjög þurrt í veðri. Það er orðin árviss viðburður að þurrkar séu hér til trafala og finnst mér eins og það séu ansi breyttir tímar.

 

Ég man mikið frekar eftir því í gegnum minn búskapar tíma að bleyta hafi hamlað vinnu í flögum og öðrum vorverkum. Að vísu man ég vel eftir köldum og þurrum dögum í maí hér áður fyrr. Þá var yfirleitt klaki í jörð og og lítið hægt að gera vegan þess. Síðan þegar hlýnaði þá fór hann að rigna og ringdi stundum svo vikum skipti.

 

Nú eru breyttir tímar. Endalaus blíða alla daga. Lítill sem enginn jarðklaki en sáralítil úrkoma. Skortur á úrkomu hefur ekki aðeins áhrif á gróður. Þurrkurinn hefur einnig haft áhrif á vatnsból bæði fyrir menn og skepnur. 

Nú er bara að vona að það komi fleiri rigningadagar næstu daga. Vafalaust verður maður samt farin að hvarta yfir rigningunni áður en langt um líður. Það er þannig með veðrið að seint verður hægt að gera mönnum til hæfis.

Í fréttum af úrslitum kosninganna hér í sveit er því gjarnar slegið upp að hér hafi virkjanasinnar unnið stóran kosningasigur. Ekki er ég nú viss um að við öll sem gáfum kost á okkur á R listann skilgreinum okkur sem einhverja "virkjanasinna"  þó svo að við vissulega höfum fallist á að gera ráð fyrir Urriðafossvirkun á  aðalskipulaginu og ætlum að vinna áfram  í samstarfi við Landsvirkun um mótvægisaðgerðir vegan hennar.

Virkjanamál eru einfaldlega flóknari en svo að hægt sé að skipta fólki upp í virkjanasinna annarsvegar  og virkjanaandstæðinga hinsvegar eins og mér finnst fjölmiðlar gjarnan vilja gera. Þó fallist sá á Urriðafossvirkjun er ekki þar með sagt að þá vilji menn virkja skilyrðislaust alls staðar þar sem því verður við komið. Eins er ekki hægt að ganga út frá því að allir þeir sem ekki vilja að Urriðafossvirkun verði byggð séu allfarið á móti því að orkan í fallvötnum og/eða í iðrum jarðar sé virkuð yfirleitt.

Það er mikilvægt með virkjanir sem og allar aðrar framkvæmdir að kostir og gallar séu vel ígrundaðir áður en ákvarðanir eru teknar. Þetta á við um allar farmkvæmdir stórar og smáar. Allar framkvæmdir sem og önnur mannanaverk hafa umhverfisáhrif. Sumar jafnvel talsvert meiri en t.d. Urriðafossvirkun en þurfa samkvæmt lögum ekki umhverfismat og eru jafnvel ekki skipulagsskildar.

Bæði frambjóðendur og kjósendur R listans hafa vafalaust mismikinn áhuga á byggingu  Urriðafossvirkunar. Rekstur sveitarfélagsins snýst heldur alls ekki um þessa virkjun. Það eru allt aðrir hlutir sem sveitarfélagið er að fást við frá degi til dags.  

Um síðustu helgi var haldinn hér í sveit hátíðin "Fjör í Flóanum.  Félagsheimilin í Flóahreppi hafa haldið þessa hátíð síðast liðin fimm ár um mánaðarmótin maí/júní. Þátttaka og fjöldi gesta hefur verið vaxandi ár frá ári og sýnist mér að þetta sé viðburður sem komi til með að vera hér árlega áfram. Tilgangur með svona hátíð er kannski tvíþættur. Annars vegar að kynna þá starfssemi og þjónustu sem hér er boðið upp á. Hinsvegar að íbúar sveitarfélagsins geri sér dagamun saman í upphafi sumars.

Þeir viðburðir á hátíðinni sem ég kom á voru vel sóttir og mér skilst að svo hafi verið með flest atriði hátíðarinnar. Veðrið var með eindæmum gott og er það ótvíræður kostur á svona hátíð. Á föstudeginum var ég viðstaddur opnunnar atriði hátíðarinnar í Þjórsárveri. Þar var búið að setja upp heilmikla sýningu á verkum nemenda í Flóaskóla auk þess voru sýnd atriði úr söngleikum  "Grease" sem nemendur sýndu með eftirminnanlegum hætti fyrr í vetur. Á föstudagskvöldið stóð Umf. Vaka fyrir kvöldvöku á íþróttavellinum við Þjórsárver þar sem fjölmenni var. Auk þess sem grillað var saman, flutti Leikdeild Umf. Vöku leikþáttinn "Ýsa varð það heillin" og keppt var í reiptogi.....  Man ekki allveg hvernig það endaði.

Á laugardeginum var opið hús í nýbyggingunni við Flóaskóla þar sem ég fyrir hönd sveitastjórnar, Gestur í Smíðanda fyrir hönd verktakans  og Kristín skólastjóri tókum á móti gestum og sýndum þeim bygginguna. Skólinn bauð upp á kaffisopa í anddyri nýbyggingarinnar og smákökur voru í boði 8. bekkinga. Nokkur fjöldi gesta kom og fannst mér fólki lítast vel á hvernig til er að takast með þessa byggingu og almenn ánæga með þær breytingar sem hér er verið að gera á starfsemi skólanns. Á laugardagskvöldið var kvöld- og kosningavaka í Þingborg.

Á sunnudeginum kom ég m.a. á fjölskylduskemmtun í Félagslundi sem var mjög vel sótt. Lögð var áhersla á að vera með dagskrá fyrir börn og sá ég ekki betur en heimsókn þeirra "Skoppu og Skrítu" hafi líkað vel í þeim aldurshóp.

Vil ég þakka rekstrarstjórn og húsvörðum félagsheimilanna fyrir vel skipulagða hátíð og skemmtunina um helgina.

Nú liggja úrslit kosninganna fyrir og get ég ekki annað en verið mjög sáttur. R litinn fékk 254 atkvæði eða 72% en T listinn 97 atkvæði eða 28%. Kosningaþátttaka var nokkuð góð eða um 85,5%. Auðir seðlar voru 14 og 1 ógildur.

Kosningabaráttan gekk vel fyrir sig. Nokkuð fannst mér sótt að okkur og höfðum við gott af því. Það gaf okkur líka tækifæri til þess að skýra okkar málstað betur en umræða meðal kjósenda var talsverð. Hitti ég æði marga og fékk mörg símtöl þar sem ég var spurður beint út í hin ýmsu mál og beðin um skýringar á fullyrðingum sem haldið var fram af mótframbjóðendum. Með frambjóðendur mínir á listanum unnu allir mjög vel og tóku virkan þátt í umræðunni. Lögðum við áherslu á að hitta sem flesta og ræða beint við fólkið.

Með þessum kosningum verða miklar mannabreytingar í sveitastjórninni en ég er sá eini sem er í sveitastjórn núna og held áfram á næsta kjörtímabili. sem nú er að hefjast.  Ég óska nýkjörnum sveitastjórnarmönnum til hamingju með kjörið og hlakka til þess að vinna með þeim. Fráfarandi sveitastjórnarmönnum þakka ég mikið og gott samstarf á síðast liðum fjórum árum. Þetta samstarf hefur verið bæði árangursríkt og farsælt.

  

Vorið er alltaf skemmtilegur tími. Þetta vor er ekki minna annasamt en öll önnur vor. Verkefnin eru áhugaverð og það gefur öllum kraft að fylgjast með bæði gróðri og dýralífi lifna við allt í kringum sig að loknum vetri. Bæði börn og fullorðnir fyllast bjartsýni og verkgleði.

Sauðburður hér á bæ gekk mjög vel og mikið til orðið af lömdum. Alls komu hér 11 þrílembur og 4 einlemdur af  35 ám. Hinar eru allar með tveimur lömbum og ein er óborin enn. Þeir frændur Hjalti Geir í Lyngholti og Arnór Leví í Jaðarkoti  buðu öllum börnunum sem eru með þeim á Strumpadeild í Leikskólanum í lambaskoðunaferð hingað. Því miður var ég ekki heima þegar leikskólinn kom hér en þetta var mjög skemmtileg heimsókn.

Systkinin í Jaðarkoti fylgjast vel með hænsnaræktinni hjá ömmu sinni, en hér komu 13 ungar úr eggjum nýlega.

Það kunna engir betur en kýrnar á vorin þegar þær fara í fyrsta skipti út að sletta úr klaufunum.

Þegar mikið er að gera og unnið er úti og leikið sér allan daginn er matarlystin líka góð. Stundum er hér æði fjölmennt lið og þétt setinn bekkurinn þegar borðað er saman að loknu dagsverki. 

Vegna mikilla umræðu og skrifa um samninginn um neysluvatnið sem sveitarfélögin Árborg og Flóahreppur gerðu sín á milli fyrir nokkru ritaði ég eftirfarandi grein í héraðsblöðin í þessari viku:

Í síðasta mánuði var undirritaður samningur um öflun og sölu neysluvatns milli sveitarfélagsins Árborgar og Flóahrepps. Með þessum samningi er mikilvægu skrefi náð í neysluvatnsmálum í Flóahreppi. Samningurinn tryggir vatnsveitu Flóahrepps aðgang að fyrsta flokks neysluvatni hvenær sem er og í því magni sem á þarf að halda hverju sinni, allt að 20 lítum á sekúndu. Hér er um mikið öryggisatriði að ræða fyrir vatnsveitu Flóahrepps en sem kunnugt er hafa verið vandræði með vatn í sveitarfélaginu í þurrkum á liðum sumrum.

Samkvæmt samningi sem Flóahreppur gerði við Landsvirkjun sumarið 2007 mun fyrirtækið fjármagna þær framkvæmdir sem ráðast þarf í vegna þessa samnings. Allar framkvæmdir innan sveitarfélagsmarka Flóahrepps verða eign og hluti af veitukerfi sveitarfélagsins. Þær framkvæmdir sem ráðast þarf í innan bæjarmarka Árborgar mun Árborg endurgreiða Flóahrepp að fullu í formi vatns á næstu árum eða áratug. Viðskipi með vatnið fara fram á sveitarfélagsmörkum samkvæmt mæli á sanngjörnu verði fyrir bæði sveitafélögin.

Sú staðreynd að Flóahreppur gerði samning við Landsvirkjun um þennan stofnkostnað í tengslum við gerð aðalskipulags hefur orðið tilefni þess að ýmsir hafa reynt að gera vatnssamninginn í heild tortryggilegan. Fullyrt hefur verið að einhver önnur sjónarmið en hagsmunir íbúa Flóahrepps hafi verið hafðir að leiðarljósi við samninsgerðina. Svo er alls ekki. Landsvirkjun hafði engan sérstakan áhuga á að fara í þetta verkefni nú. Það er ekki von til þess að ráðist verði í virkjun Urriðafoss á þessu ári og Umhverfisráðherra var búinn að setja aðalskipulagsmálið í ferkari tafir. Það er eingöngu vegna  þess að fyritækið er samningbundið Flóahrepp að þeir koma að málinu nú.

Það er einnig eingöngu vegna hagsmuna vatnsnotenda í Flóahreppi að ekki er beðið með að fara í framkvæmdir þegar samningsniðurstaða loks er fengin. Það er mikilvægt að koma sem fyrst á öflugum tengingum milli sveitarfélaga þannig að einhver not gæti verið af framkvæmdinni strax í sumar.  Samningurinn er óuppsegjanlegur til þess að tryggja að Flóahreppur hafi not af framkvæmdinni til framtíðar en hér er vissulega verið að ráðstafa miklum fjármunum í framkvæmdir.

Bent hefur verið á að hagstæðara gæti hafa verið að sækja vatnið í grunnvatnsstraum sem líkur eru á að sé undir hrauninu í landi Hjálmholts noðran við Bitru. Afhverju menn halda að hagstæðara sé að fara í vatnsölfun á nýju svæði þar sem eftir er að gera nauðsynlegar rannsóknir, semja um vatnsréttindi, bora og virkja neysluvatnsholu sem gefi allt að 20 lítra á sekúndu og leggja stofnlögn úr Hjálmholtshrauni í miðlunartanka veitunnar veit ég ekki. Hinsvegar er nauðsynlegt að benda á að  vatnstaka í hrauni á láglendi með landbúnað og sumarhúsabyggð allt í kring finnst mér ekki spennandi kostur. Sú vatnsvernd sem er vissulega þarna er takmörkuð og nær aðeins að sveitarfélagsmörkum. Þar fyrir ofan er skipulagt sumarhúsahverfi með tugi rotþróa.  

Ef Flóahreppur ætlar að hafa það áfram að markmiði að bjóða öllum vatnsnotendum í sveitarfélaginu, sem þess óska, að tengjast vatnsveitu sveitarfélagsins með gæða neysluvatni er ekki komist hjá kostnaðarsömum úrbótum. Hvort næsta sveitarstjórn vill falla frá  samkomulaginu við Landsvirkun frá 2007 eða ekki breytir þar engu um. Ef það á að fall frá þessu samkomulagi  bið ég menn samt að hafa þann metnað að takast á við þau verkefni sem nauðsynleg eru á raunhæfan hátt.

Á miðvikudagskvöldið s.l. var haldinn framboðsfundur í Þjórsárveri. Það vorum við frambjóðendur R listans sem boðuðum til fundarins til þess að kynna  stefnuskrá okkar og helstu áherslur í komandi kosningum til sveitarstjórnar Flóahrepps.

Við ákváðum að hafa fundinn með nýju sniði og slepptum öllum framsöguræðum og ræðum yfirleitt. Þess í stað var öllum fundarmönnum skipt í sex til átta manna umræðuhópa. Við frambjóðendur fórum svo á milli hópanna og ræddum beint við fundarmenn um það sem þeim lá mest á hjarta í hverjum  hóp. Við stoppuðum í 10 mín á hverju borði. 
 

Mér fannst þetta gefast ágætlega. Þarna fóru fram bein skoðanaskipi og ég vona að fundarmenn allment hafi verið sáttir við þetta. Þeir höfðu tækifæri á að spyrja okkur frambjóendur beint og fá  svör strax.

Ég finn fyrir töluverðum áhuga hjá fólki að ræða hin ýmsu mál. Það er áhugavert og nauðsynlegt að einbeita sér að því. Það er því æði verk framundan ef við eigum að ná því að spjalla við alla kjósendur fyrir kosningar.

Á sveitarstjórnarfundi í vikunni staðfesti sveitarstjórnin Samning um öflun og sölu vatns  milli Flóahrepps og Árborgar. Samningur þessi er búin að vera í undirbúningi í allan vetur og var undirritaður fyrir skemmstu. Stórum áfanga er nú náð í vatnsmálum beggja sveitarfélaganna. Aðili að þessu samningi er Landsvirkjun en samkvæmt samkomulagi milli hennar og Flóahrepps mun fyrirtækið fjármagna þær framkvæmdir sem ráðast þarf í vegna vatnsöflunnar í Flóahreppi.

Eins og allir góðir samningar þá er þessi samningur báðum sveitarfélögunum mjög hagstæður. Hann tryggir íbúum Flóahrepps aðgang að fyrsta flokks vatni allt að 20 lítrum á sekúndu. Flóahreppur kaupir vatnið í því magni sem hann þarf á að halda hverju sinni á sveitarfélagsmörkum á hagstæðu verði. Hér er um mikið öryggisatriði að ræða til framtíðar fyrir íbúa Flóhrepps.

Töluverðar framkvæmdir þarf að ráðst í vegna þessa í báðum sveitarfélögunum og er samkomulag um að þeim verði skipt á tvö ár.  Þær endurbætur og sveranir á lögnum í Árborg  sem gerðar verða munu nýtast vel innan Árborgar auk þess sem meira vatn verður virkjað við rætur Ingólfsfjalls.

Hér í sveit þarf að leggja nýja stofnlögn með þjóðvegi eitt frá sveitarfélagsmörkum að Neistastöðum og þaðan í miðlunartankinn í Ruddakrók. Þessi stofnlögn styrkir dreyfikerfið í gamla Hraungerðishreppnum og gefur möguleika á frekari uppbyggingu t.d. upp með Langholtsvegi.

Með þessum samningi taka Flóahreppur og Árborg upp meira samstarf í neysluvatnsmálum en verið hefur. Mér finnst nokkuð ljóst að með meira samstarfi sveitarfélaga í málefnum neysluvatns er hægt að stórbæta bæði rekstur og öryggi vatnsveitna á Suðurlandi.  Árborg og Flóahreppur hafa nú stigið mikilvægt skref í þessum málum sem á eftir að koma íbúum og fyrirtækjum í þessum sveitarfélögum til góða til langrar framtíðar.

Hér á bæ er lífið nokkuð fjölbreytt og verkefnin sem verið er að fást við mörg og misjöfn. Hér háttar svo til að hér er vettvangur fjögurra ættliða í starfi og leik. Öll stöndum við með einum eða öðrum hætti að þeim búskap sem hér er stundaður en þar fyrir utan er einnig verið að fást við hin fjölbreyttustu verkefni á sviði félagsmála og annarra áhugamála. Mörg okkar stunda einnig aðra atvinnu með búrekstrinum.

Meðlimur úr elstu kynslóðinni tók til við að byggja bæ í svartasta skammdeginu í vetur. Byggingarefnið var afgangs byggingarefni sem hér hefur fallið til í gegnum árin og verið haldið til haga af stakri hirðusemi. Ekki hefur fundist not fyrir þetta byggingarefni fram til þessa og það hefur aðallega tekið páss í geymslum.

Bæinn byggði hann innadyra en alltaf er nóg pláss í hlöðunni. Við smíðina naut hann aðstoðar yngstu kynslóðarinnar sem tók virkan þátt í smíðinu. Þau fylgdust með af áhuga hvernig bærinn varð til frá fyrstu spýtu til síðasta nagla. Eftir að smíðinni lauk hafa þau svo notið góðs af en bæinn hafa þau óspart notað til sinna leikja.   

Á Sumarsdaginn fyrsta þótti tilhlíðilegt að flytja bæinn út undir bert loft. Systkinin í Jaðarkoti, þau Aldís Tanja og Arnór Leví,  tóku fullan þátt í verkefninu enda hafði bænum verið fundinn staður í bakgarðinum heima hjá þeim. Þar á hann eflaust eftir að þjóna sínu hlutverki sem vattvangur sumarleikja barnanna. 

Nú er tekinn við annasamur og skemmtilegur tími í sveitinni. Kornakrana er verið að vinna og sauðburður er hafinn. Fyrsta ærin bar í gær og varð þrílemd.

Afréttamálafélag Flóa og Skeiða hélt aðalfund sinn í fyrrakvöld. Á árvissum afréttamálafundi í ágúst í fyrra setti félagið sér nýjar samþykktir um sína starfssemi og var þetta fyrsti aðalfundurin sem haldin er samkvæmt þeim.

Ég var talsmaður þess og lagði það til á sínum tíma að félagið setti sér nánari samþykktir til þess að starfa eftir en fram til þessa starfaði félagið eingöngu eftir óljósum tilmælum í fjallskilasamþykkt fyrir Árnessýslu austan vatna nr 408 /1998. Með sameiningu sveitarfélaga á svæðinu höfðu aðstæður líka breyst frá því að fjallskilasamþykktin var samþykkt og ýmislegt í þeim sem varla átti við lengur.
 

Samkvæmt nýjum samþykktum skal Afréttamálafélagið halda tvo afréttarmálafundi á ári hverju. Fyrri  fundin skal halda fyrir 1. maí þar sem m.a. reikningar síðast liðins árs eru afgreiddir og fjárhagsáætlun  ársins samþykkt. Seinni fundurinn er svo haldinn í ágúst þar sem raðað er í leitir og tilhögun smölunnar og rétta er ákveðin. Á fundunum fara fullrúar sveitarfélaganna sem standa að félaginu með atkvæðisrétt . Fulltrúarnir eru alls átta og koma 4 frá Flóahreppi. Sveitarfélagið Árborg skipar tvo og Skeiða-og Gnúpverjahreppur tvo.


Myndin er tekin í réttunum s.l. haust þegar verið er að leggja af stað heim á leið.   

Eitt af þeim verkefnum sem mest hafa vaxið hjá sveitarfélögum á síðustu árum er sorphirða og sorpeyðing. Frá árinu 1995 hafa sunnlendingar getað losnað við allt sitt sorp á til þess að gera ódýran hátt í Kirkjuferjuhjáleigu þar sem það hefur verið urðað. En 1. desember s.l. var þessum sameiginlega urðunarstað sveitarfélaganna á Suðurlandi lokað samkvæmt samkomulagi við Sveitarfélagið Ölfus frá árinu 2004. Síðan þá hefur ruslinu verið ekið til Reykjavíkur þar sem það hefur síðan verið urðað í Álfsnesi.  Kosnaður hefur stórlega aukist bæði vegna lengri flutninga og mikið hærri kosnaðar við urðunina.

Þessi staða sem nú er komin upp hefur verið fyrirsjáanleg í tæp 6 ár og því nokkur aðlögunartími fyrir sveitarfélögin að bregðast við. Sveitastjórn Flóahrepps fór snemma á þessu kjörtímabili að velta fyrir sér hvernig best væri að sporna við þessum kostnaðarauka og vaxandi umhverfisskaða sem sífeld aukning á sorpi vissulega er.
 

Niðurstaðan varð sú að taka hér upp í samvinnu við Íslenska Gámafélagið þriggja tunnu sorpflokkunarkerfi. Kerfið sem byggir á þátttöku íbúa svæðisins hefur gengið mjög vel og sá árangur sem að var stefnt hefur náðst.  Ávinningur er margvíslegur og má t.d. nefna:

• Sorp sem þarf að urða hefur minnkað um meira en helming í sveitarfélaginu.
• Það sorp sem er urðað er ekki bara minna að magni heldur líka minna umhverfisspillandi.
• Nýtanleg efni og verðmæti sem áður voru urðuð eru endurnýtt.
• Aukin nýting dregur úr sóun á allskonar efnum sem viðgengist hefur lengi.
• Þátttaka íbúa í sorpflokkun eykur vitund þeirra í þessum málum.
• Aukin vitund neytenda í úrgansmálum hefur áhrif á neyslu og gæti minkað framleiðslu á sorpi.

Ýmislegt fleira jákvætt væri hægt að nefna í þessu sambandi en ég er mjög stoltur af þessu frumkvæði sem íbúar Flóahrepps hafa tekið í þessum málum.

 

 Á því svæði sem nú heitir Flóahreppur hafa verið reknar sameiginlegar dreifiveitur fyrir neysluvatn í hátt í fjörutíu ár. Um gríðalega mikla og stórhuga framkvæmd hefur verið að ræða á sínum tíma fyrir þau þrjú sveitarfélög sem þá voru hér starfandi. Ekki þarf að efast um það að þessi framkvæmd skipti sköpum fyrir allt samfélagið hér á sínum tíma og þær hafa skilað samfélaginu miklu á þessum áratugum sem þær hafa verið starfandi.

Í flestum tilfellum hafa þessar vatnsveitur reynst vel og eru í fullu gildi enn í dag. Töluverð breyting hefur samt orðið meðal neytenda og vatnsnotkun aukist á hvern íbúa hér eins og annarsstaðar. Í upphafi virðast menn þó hafa haft þá framsýni að dreifikerfið hefur í flestum tilfellum getað annað viðbótarnotkunn og nýjum notendum. Ljóst er samt að á ákveðnum stöðum er afkastageta veitunnar að verða of litil.

Þau vandamál sem helst hafa komið upp í rekstri þessara veita eru m.a. bilanir á veitunni. Lekar hafa á sumum svæðum verið þrálátir og kostnaður nokkur við lekaleit og viðgerðir. Vandamál við vatnslindirnar hafa einnig komið upp. Vatnsborð í þeim hefur lækkað í þurrka tíð og einnig hafa jarðskjálftar haft áhrif á lindirnar. Í einhverjum tilfellum hafa óhreinindi greinst í vatninu og í verstu tilfellum hefur gerlafjöldi farið yfir viðmiðunarmörk heilbrigisyfirvalda.. Þegar það hefur komið upp hefur það verið rakið til yfirborðsmengunar í "Urriðafosslind". Sú lind var virkjuð fyrir Stokkseyri á sínum tíma. Eftir að ný aðveita fyrir Stokkseyri frá Selfossi var tekin í gagnið hefur Urriðafosslind eingöngu verið notuð til þess að koma í veg fyrir vatnsleysi í miklum þurrkum.   

Í aðdraganda síðustu sveitarstjórnarkosninga var nokkuð rætt um að úrbætur þyrfti að gera  á vatnsveitunni. Það vandamál sem helst var verið að benda á var þrýstingsleysi á vatnsveitunni í efsta hluta sveitarfélagsins þ.e.í hluta af gamla Hraungerðishreppnum og á efstu bæjum í gamla Villingaholtshreppnum og á sumarhúsasvæðunum í Merkurhrauni, Merkurlaut og í Mörk.  Til þess að bregðast við þessu hefur verið sett upp dæla við "Samúelslind" í Þingdal. Í fyrstu var keyrð þarna dísel rafstöð og komið fyrir bráðabirgða dælu en nú er búið að fá þarna rafmagn með heimtaug frá RARIK og koma fyrir varanlegri dælu með stýribúnaði sem heldur uppi jöfnum þrýsingi á veitunni. Jafnframt því var lindin fóðruð upp og tengingar allar endurnýjaðar.
 

Á síðasta ári var gerð umfangsmikil bilanaleit á veitunni. Það skilaði heilmiklum árangri og hefur viðgerð farið fram á veitunni á ýmsum stöðum. Vatnsveitan hafði í þessari vinnu aðgang að sérstökum rennslismæli sem mælir rennsli í lögnunum með nemum sem settir eru utan á þær. Þessi mælir hefur reynst mjög vel í þessarri bilanaleit þar sem með honum er hægt að mæla rennslið hvar sem er á lögnunum og rekja sig að bilunum.

Jafnframt þessu hefur sveitartjórn Flóahrepps leitað samstarfs við önnur sveitarfélög um vatnsöflun. Markmið sveitarstjórnar í þeirri vinnu er að tryggja að veitan hafi alltaf aðgang að fyrsta flokks neysluvatni á sem öruggastan hátt. Horft hefur verið til þess að geta sótt vatn á öflugri vatnstökusvæði en hægt er að finna hér innansveitar og með vatnsverndarsvæði utan byggðar við rætur hálendis eða fjalla. Hér er um mikið öryggisatriði að ræða og horft hefur verið til framtíðar í allri þessarri vinnu.