Ásavegur

Ég hef nú nokkrum sinnum farið þessa leið áður en hafði engu minna gaman af nú en áður. Farastjórar voru þau hjón á Hurðarbaki Ólafur og Kristín. Þau lýstu staðháttum og rifjuðu upp söguna en gengið var um söguslóðir Flóamanna sögu. Þetta gerðu þau á lifandi og skemmtilegan hátt sem ég held að allir sem þátt tóku hafi kunnað að meta. 

Gengið var frá Orustudal við Hurðarbaksveginn sem leiðin liggur í gegnum lönd Breiðholts, Dalsmynnis, Hurðarbaks, Hnaus og Neistastaða og endað þar sem Ásavegurinn fer um Gilvað á Bitrulæknum rétt við þar sem afleggjarinn heim að Hnausi er af Flóaveginum. Myndin er tekin þegar áð var við Skotmannshól. 

Ásavegurinn var þjóðleiðin niður að Eyrabakka og á hann söfnuðust flestir er þangað áttu leið. Þeir sem komu niður Skeið úr uppsveitum Árnessýslu, Einnig Rangæingar og Skaftfellingar sem komu yfir Þjórsá hvort sem var á ferju við Krók eða Egilsstaði eða komu yfir á Nautavaði á Þjórsá. Flóamenn notuðu þennan veg einning m.a við að koma fé á afrétt og heim aftur úr réttum á hausti.

Mér skilst að hann hafi legið frá Orustudal áfram suður norðan við bæinn Önundarholt og fram Suluholtsmúla. Þaðan um Rútstaða- og/eða Seljatunguland og Gegnishóla hverfi og niður á Hólavöll sem var skilgreindur löggiltur áningastaður. Þaðan hefur væntanlega verið farið ströndina að Eyrabakka