Daginn tekur að stytta

Október er nú að renna sitt skeið og framundan eru myrkustu vikur ársins. Tíðafarið undanfarið hefur heldur verið til þess fallið að minna mann á skammdegið framundan. Það er aðallega boðið upp á rigningu og rok flesta daga.

Nóg er af verkefnum samt að fást við. Þessi mánuður hefur að vísu mikið farið á fundarsetur hjá mér. Nú síðast var Ársþing sunnlenskra sveitarfélaga en það var í Vík nú á föstudag og laugardag í siðustu viku. Ég fór reyndar austur strax á fimmtudag vegna stjórnarfundar hjá SASS sem haldinn var þá í tengslum við þingið.

Hér á bæ er búið að slátra öllu fé sem á að slátra þetta haustið. Hrútar og lömb eru komin á hús. Ærnar verða teknar einhvern tíman á næstu vikum eða þegar það hentar rúningsmanninum að koma hér. Búið er að sleppa reiðhrossunum og því lítið um útreiðar þessa dagana. Talsvert er borið af kúm í fjósinu eftir að burður hófst um mánaðarmótin ág.-sept. og hefur það að mestu gengið prýðilega.  

Eins og undanfarin ár þá stendur rekstrarstjórn félagsheimilanna í Flóahreppi fyrir "Tónahátíð" í haust. Hátíðin saman stendur af þremur viðburðum hvert í sínu félagsheimilinu í sveitarfélaginu. Byrjað var í Félagslundi 1. október s.l á tónleikum með lögum Oddgeirs Kristjánssonar úr Vetsmanneyjum. 15. október var síðan leikþátturinn "mamma ég" sýndur í Þjórsárveri ásamt því sem heimamaðurinn Sigurður Ingi Sigurðsson var með uppistand.

Núna n.k. laugardagskvöld 5. nóv verður Helgi Björnsson og "Reiðmenn vindanna" í Þingborg svo með stórtónleika. Það er ástæða til þess að hvetja fólk til þess að láta það ekki fram hjá sér fara.