Það hefur ýmislegt gengið brösulega hér í þessu þjóðfélagi á undanförnum árum. Það sjónarmið var hér allsráðandi að hin svo kölluðu markaðslögmál myndu leysa hér öll vandamál. Farið var offari í því að einkavæða hinar ýmsu stofnanir og fyrirtæki sem áður voru í eigu samfélagsins í þeim tilgangi að koma hér á samkeppni sem allir áttu að græða á. Því var að minstakosti haldið fram á þessum tímum og almennigur beið spenntur eftir  öllum þessum ágóða.  

Í dag er nú komið í ljós að ekki voru allar þessar aðgerðir til fjár fyrir hinn almenna borgara og í sumum tilfellum sitjum við uppi með mjög bregað umhverfi sem allir tapa á. Í gærmorgun hittum við Margrét sveitastjóri, Kristján Möller samgöngu- og sveitastjórnarráðherra m.a. til þess að ræða möguleika á að koma á betri tölvutengingum hér í sveit. Kristján var kominn hér austur fyrir fjall til þess að hitta forsvarsmenn fangelsins á Litla Hrauni en þeim er umhugað að fá betri nettengingar vegna fangelsisins sem verið er að koma á legg í Bitru hér í sveit. Það hefur nefnilega komið í ljós að vegna þess að Bitra er hvorki staðsett í fjölmennu þéttbýli eða lengst inn í afdal þá er ekki hægt að bjóða upp á öflugar nettengingar nema fyrir margfaldann þann kostnað sem aðrir aðilar með svipaða þjónustu þurfa að borga. Þetta er einmitt það hlutskipti sem íbúar í Flóahreppi hafa þurft að búa við.

Vegna samkeppnissjónarmiða telur Síminn sig ekki geta boðið upp á öflugri tölvutengingar eins og ADSL hér í sveit nema þjónustan standi undir sé innan svæðisins. Mér skilst að sem markaðsráðandi fyrirtæki telji þeir sig ekki meiga deila þessum kostnaði á önnur viðskipi sín á öðrum þéttbýlli og arðsamari svæðum vegna þess að þá væru þeir að misnota stöðu sín gagnvart minni fyrirtækjum sem hér bjóða þjónustu. Værum við stödd í einangruðum afdal inni á afrétti þá er til reiðu fjármagn í opinberum sjóði til þess að greiða þennan kostnað vegna þess að þar eru engin önnur fyrirtæki að reyna fyrir sér með viðskipti.

Mér  finnst þessi staða ekki ásættanleg fyrir íbúa Flóahrepps. Það þarf að komast út úr þessu á einhvern hátt þannig að íbúar landsins sitji við sama borð allstaðar. Mér finnst þetta galin hugmyndafræði að íslendingar séu að leggja í kostnað við að reka fjölda dreifikerfa og nettenginga með misjöfnum árangri og verja það með þessum hætti.

Þetta er svo sem ekki eitthvað sem var að koma í ljós í gærmorgun. Sveitastjórn Flóahrepps hefur reynt að beita sér í þessu málum. Þetta hefur verið tekið upp í samtölum við síma- og fjarskiptafyrirtæki. Einnig höfum við bent á þetta við ráðherran áður og við þingmenn kjördæmisins. Nú þegar fangelsisyfirvöld hafa átta sig á þessu óréttlæti og gengið í lið með okkur í þessari baráttu er spurning hverju það breytir.

Þ og E listi sem buðu fram í sveitarstjórnarkosningunum fyrir 4 árum hafa nú ákveðið að bjóða fram saman í kosningunum vor. Fulltrúar þessarra framboða eru sammála um að halda áfram því góða starfi sem unnið hefur verið að á kjörtímabilinu og verja þann árangur sem náðst hefur.

Á þessu kjörtímabili hefur samstarf þessarra framboða verið mjög gott og skilað miklum árangri við mótun og uppbyggingu á nýju sveitarfélagi. Fulltrúar þeirra í sveitastjórn hafa verið samstíga í því að reka hér öflug og framsækið sveitarfélag. Áhersla hefur m.a. verið að sína  ráðdeild í öllum rekstri og hafa kjark til þess að leita nýrra leiða í því að efla hér samfélagið.

Listinn sem boðin verður fram er þannig skipaður:

1.      Aðalsteinn Sveinsson Kolsholti 1

2.      Árni Eiríksson Skúfslæk 2

3.      Elín Höskuldsdóttir Galtastöðum

4.      Hilda Pálmadóttir Stóra-Ármóti

5.      Björgvin Njáll Ingólfsson Tungu

6.      Alma Anna Oddsdóttir Fljótshólum

7.      Heimir Rafn Bjarkason Brandshúsum 4

8.      Ágúst Ingi Ketilsson Brúnastöðum

 9.     Karen Viðarsdóttir Laufhól
10.    Einar H. Haraldsosn Urriðafossi

Nú þessa dagana er verið að halda kynningarfundi á vegum Verkefnisstjórnar  2. áfanga Rammaáætlunar um vernd og nýtingu náttúrusvæða með áherslu á vatnsafl og  jarðhitasvæði. Á þessum fundum eru kynntar niðurstöður faghópa verkefnisstjórnar sem metið hafa svæði og virkjunarkosti, hver á sínu sérsviði. Skýrslu verkefnisstjórnar um virkjunuarkosti til mats og niðurstöður faghópa, auk ítarefnis, má nálgast á vefsíðu rammaáætlunar, www.rammaáætlun.is,

Ég hef verið að lesa þessar skýrslur og kynna mér efni þeirra. Það hefur verið hlutverk okkar sem í sveitastjórn Flóahrepps hafa starfað á þessu kjörtímabili að reyna að leggja  mat  á það hvaða áhrif fyrihuguð Urriðafossvirkjun geti haft í sambandi við aðalskipulagsgerð okkar í fyrrum Villingaholtrhreppi. Búið er að leggja fram mikið efni varðandi þessa vinnu og rætt hefur verið við fjölda fólks og hlustað á margs konar rök ýmist sem mæla með virkjun eða á móti. Því miður hefur umræðan ekki alltaf verið mjög gáfuleg og oft á tíðum snúist um allt annað en áhrif virkjunarinnar. Nú á síðustu mánuðum virðist baráttan aðalega snúast um það hvort réttlætanlegt sé að eitthvað af hugsanlegum ávinningi af virkjuninni, ef af verður, megi nýtast samfélaginu hér í sveit eða ekki.  

Mér sýnist í aðalatriðum að í rammaáætluninni sé verið að nálgast þetta viðfangsefni á nokkuð skynsaman máta og það sé verið að fjalla um þau atriði sem skipt geta máli, sérstaklega við það að bera saman virkjanakosti. Ég vil hvetja alla sem vilja og ætla sér að taka þátt í umræðunni um virkjanir til þess að kynna sér þessar skýrslur vel.