Á þessum fallega en kalda jóladegi sendi ég lesendum síðunar mínar bestu jólakveðjur. Ég vil þakka öll góð og skemmtileg samskipti á árinu. 

Undanfarna daga hefur verið snjór yfir öllu hér í Flóanum. Það þarf nú ekki endilega að koma á óvart á þessum árstíma og það vissulega hjálpar í baráttunni við myrkrið í skammdeginu að hafa hvíta jörð. 

Ég hef undanfarin haust staðið í því að reykja kjöt. Nú orðið finnst mér minna varið í hangikjöt nema hafa reykt það sjálfur. Þetta er að sjálfsögðu bara fyrirhöfn og vesen. En ég er haldinn þeirri áráttu að finnast tilveran áhugaverari ef maður hefur hæfilega mikið fyrir hlutunum.