Í Flóanum

Færslur: 2015 Desember

25.12.2015 22:22

Gleðileg jól

Ég óska öllum gleðilegra jóla. Það er vonandi að fólk njóti hátíðarinnar í samræmi við væntingar sínar. Barnabörnin mín öll hafa beðið þess með óþreyju síðustu vikur að jólin fari að koma og nú loks hefur ræst úr því.

Eins og svo oft áður hafa síðustu vikur fyrir jól verið annasamar. Yngsta sonardóttir mín, hún Rakel Ýr í Jaðarkoti,  þurfti um miðjan desember að dvelja á sjúkrahúsi í nokkra daga og var móðir hennar þá þar með henni. Það var vitaskuld nú heldur til þess að auka álag á heimilinu þessar síðustu vikur fyrir jól.

Ég gerði það tvo morgna að fara niðureftir í Jaðrakot og vera hjá börnunum þar á meðan pabbi þeirra var í morgunmjöltun því mamma þeirra var fyrir sunnan með Rakel litlu. Ég kom þangað um hálf sex og börnin í fasta svefni. Ég lagði mig bara í stofusófan og var þar þangað til búið var að mjólka. Ég var svo farin aftur áður en börnin vöknuðu

Það sem ég vissi ekki þá, en kom í ljós seinna um morguninn þegar Hrafnkell Hilmar 5 ára sonarsonur minn sagði systkinum sínum frá, var að hann hafði vaknað á meðan ég lá þarna í sófanum. Ég hef sennilega sofnað. Kvöldið áður hafði Hrafnkell farið að dæmi eldri systkina sinna og sett skóinn  sinn út í glugga. 

Hann mundi það frá síðustu jólum að það gat verið vænlegt til árangurs. Það var nefnilega von á fyrsta jólasveininum um nóttina. Nú vaknar hann þarna í morgunsárið. Hann er nú víst nokkuð vanur því að vakna snemma og fara á fætur á undan öðrum á heimilinu. 

Nú var hann ekki alveg viss hvað klukkan var orðin. Það var smá beygur í honum því hann mundi að von gat verið á honum Stekkjastaur um nóttina. Hann læddist því varlega fram án þess að kveikja ljósið og skymaði í allar áttir í myrkrinu. 

Þegar hann kom fram í stofu sá hann að etthvað var í sófanum. Hann áttaði sig strax á því að það gat ekki verið jólasveininn. Í fyrsta lagi gat það ekki staðist að jólasveininn lægi upp í sófa á þessum anna tíma. Í öðru lagi sá hann það, þó skuggsýnt væri, að þessi vera í sófanum var ekki í rauðum fötum. 

Hann lagði því saman tvo og tvo og komst að þeirri skynsamlegu ályktun að þetta hlyti að vera hreindýrið sem var þarna í sófanum. Einhvers staðar varð það að vera á meðan jólasveinninn var að setja í alla skóna á bænum. Það var líka einboðið að hreindýrið varð að nota hverja stund sem gafst til þess að hvíla sig og því rökrétt að fleyja sér í sófan þegar færi gafst.

Hrafnkell vildi nú alls ekki verða fyrir því óláni að vera valdur þess að hreindýr jólasveinsins myndi fælast. Hann læddist því varlega til baka inn í rúmið sitt og lagðist þar. Hann var pínu ánægður með sig að hafa upplýst leyndarmálið um jólasveininn. Hann sofnaði fljótlega aftur vongóður að það biði hans eitthvað í skónum þegar hann myndi vakna aftur.

Og það klikkaði ekki. emoticon





08.12.2015 21:11

Óveður

Það hefur verið bölvuð ótíð undanfarið sem er engan vegin til upplyftingar í svartasta skammdeginu. Það er svo sem ekki nýtt að tíðarfarið sé misjafn. Það hefur alltaf verið svo síðan ég man eftir mér og verður sjálfsagt áfram um ókomna framtíð. Leiðindar tíð kennir manni bara að meta betur góða verðrið þegar það er í boði.

Ég átti að mæta í rannsókn á Landspítalanum á föstudagsmorguninn s.l. Þar sem veðurspá var ótrygg og hér í Flóanum hafði kyngt niður snjó svo miklum að fátítt er eins, um áraraðir, tók ég þann kostinn að fara til Reykjavíkur á fimmtudagskvöldið. 

Ég vildi ekki hætta á það að komast ekki í þessa rannsókn. Bæði vegna þess að ég er búinn að bíða eftir því að komast að í þessa rannsókn síðan í febr. s.l. Einnig var ég búinn að taka einhvern ógeðsdrykk dagana fyrir, sem var undirbúningur fyrir rannsóknina og óþarfi að láta það fara til spillis. emoticon

Rannsóknin gekk vel. Hún reyndar gekk út að það að eftir að búið var að dæla í mig einhverjum (eitur...)efnum var tekin mynd, fyst kl 10 og svo aftur kl hálf tvö. Verkefni dagsins var því aðalega hvernig maður drepur tíman í rúma 3 klst. í Reykjavík. Ég er ekki góður í þessu og fannst mér tíminn lengi að líða. emoticon

Það væri vel þegið ef einhver, sem les þetta, gæti komið með ábendingar til mín um hvað hægt er að gera í Reykjavík í 3 tíma, ef ég skyldi lenda í þessu aftur. emoticon  

Í gærkvöldi og nótt gekk óveður yfir allt land með tilheyrandi látum og tjónum víða um land. Sem betur fer virðist ekki mannskaði hafa orðið og er það þakka vert. Lögregla og björgunnasveitir höfðu í nógu að snúast sem og starfsmenn ýmissa stofnanna eins og rafveitna, vegagerð o fl. 

Hér í Flóanum var veðrið aldrei svo slæmt að tjón hlytist af. Reyndar virðist suðaustan áttin sjaldan ná þeim styrk hér eins og annarstaðar hér alllt um kring. Þau hústjón sem ég man eftir að hafa orðið hér í roki eru í suðvestan átt.

Þó ekki hafi verið hússkaðaveður í Flóanum var fjandi hvasst á tímabili. Í fyrstu var ekki nein úrkoma og fjótlega varð allveg frostlaust. Einhvern tíman í nótt fór svo að rigna af krafti líka og heyrði ég í gegnum svefninn rokið og rigninguna dynja á húsinu. Þá var dyrabjöllunni hringt.....

Það var ekki aðeins óhuggulegt vegna þess að um miðja nótt var að ræða og úti var hávaða rok og lemjandi rigning. Það var ekki síður óhuggulegt vegna þess að þessari dyrabjöllu hafði ekki verið hringt í áraraðir og reyndar enginn dyrabjölluhnappur á húsinu. emoticon  

Þegar húsið var nýtt, fyrir rúmlega 30 árum, settum við upp dyrabjöllu. Hann vildi nú gjarnan bila hnappurinn við framdyrnar og entist ekki vel. Í leti minni hætti ég að nenna að gera við hann eða skipta um og var hann því oftast óvirkur. Þegar húsið var klætt að utan fyrir rúmum 4 árum var hnappurinn tekinn miður. 

Allt annað sem dyrabjöllu tilheyrir er svo sem til staðar í húsinu og var meiningin einhvern tíman að reyna til þrautar að fá hnapp við dyrnar sem þolir sunnlennskt veðurfar. Í slagveðrinu í nótt lögðust víraendarnir, þar sem þeir kíktu út úr klæðningunni við útidyrnar, saman eða að álklæðningunni á húsinu þannig að  það leiddi á milli þeirra. Dyrabjallan tók að hringja látlaust. emoticon

Ég varð að staulast fram úr kl þrjú í nótt og taka til við að aftengja dyrabjölluna svo við gætum haldið áfram að sofa til morguns. emoticon






  • 1
Flettingar í dag: 181
Gestir í dag: 4
Flettingar í gær: 82
Gestir í gær: 17
Samtals flettingar: 49837
Samtals gestir: 5988
Tölur uppfærðar: 6.2.2023 04:46:36
clockhere

Í Flóanum

Nafn:

Aðalsteinn Sveinsson

Farsími:

8607714

Heimilisfang:

Kolsholti I

Staðsetning:

Flóahreppur

Heimasími:

4863304

Tenglar