Sumarið 1976 var ég bæði ungur og efnilegur. Ég hafði tekið þátt í frjálsíþróttaæfngum með hópi unglinga á svæði HSK veturinn áður. Í byrjun júni var svo haldið til Danmerkur í æfingabúðir. Umsjón með þessum æfingum og þjálfari í æfingabúðunum var danski þjálfarinn Ole Schöler. 

Í fyrramálið er hugmyndin að keyra vestur í Ísafjarðardjúp og dvelja þar um helgina. Tilefnið er ættarmót afkomenda afa míns og ömmu í móðurætt sem haldið verður  í Reykjanesi. 

Heyskapur er nú víða kominn af stað hér í Flóanum. Hér á bæ var byrjað að slá á fimmtudagskvöldið. Við slóum u.þ.b. 10 ha og nú er það allt komið í rúllur. Það er ennþá brakandi blíða svo senilega hefði maður átt að slá meira. Samkvæmt veðurspá er ekki víst að gefi til heyskapar í næstu viku.

Í dag eru 101 ár síðan hann tengdafaðir minn heitinn (Júlíus Sigmar Stefánsson bóndi og verkamaður 1912-1989 ) fæddist. Í tilefni þess set ég hér inn þessa mynd af honum. Ég hef ekki hugmynd um hver teiknaði hana en hún hangir hér upp á vegg.í stofunni.

Í dag er bóndinn í Jaðarkoti, hann Sigmar Örn  þrítugur.  Ég er nú búinn að þekkja hann í öll þessi þrátíu ár enda var ég viðstaddur fæðingu hans. Hann fæddist reyndar sama dag og við foreldrar hans áttum eins árs brúðkaupsafmæli.

Tvær fyrrverandi skólasystur mínar þær Þórdís og Inga höfðu samband við mig nú um daginn og bentu mér á að nú fer að koma að þeim degi að það eru fjörutíu ár liðin frá því við fermdumst saman. Sú hátíðlega athöfn mun hafa farið fram 11. júní 1973.
 
Við vorum 7 sem fermdumst þenna dag í Villingaholtskirkju. Það þykir nú nokkuð stór hópur í þessari sókn. 

Það rifjaðist upp fyrir mér, nú á föstudaginn var, að ég á í fórum mínum ljósmynd af málverki sem málað var af bæjarhúsunum í Kolsholti sennilega um eða stuttu eftir aldarmótin 1900. Þessa ljósmynd gaf mér fullorðinn maður sem hingað kom einu sinni. Það eru sennilega u.þ.b. 30 ár siðan.

Vorið er skemmtilegur en annasamur tími. Þetta vorið hef ég lítið bloggað. Það ekki vegna þess að mér hafi fundist tilveran lítið áhugvert. Vorið er alltaf fullt af áhugverðum atvikum. 

Það var sameiginleg niðurstaða á vinnufundi fræðslunefndar og sveitarstjórnar Flóahrepps 3. apríl s.l. að efna til ráðgefandi skoðanakönnunnar, samhliða Alþingiskosningunum n.k. laugardag, um framtíðarstaðsetningum leikskólans hér í sveit. 

Í kvöld verður íbúafundur í Þingborg þar sem álitsgerð um starfsaðstöðu leikskólans Krakkaborgar í Flóahreppi verður kynnt. ( \files\Alitsgerd A4 (5).pdf )  Álitsgerð þessi er unnin af Trausta Þorsteinsssyni og Hólmfríði Árnadóttur. í henni er leitast við að svara spurningunni:  Er hagkvæmt, rekstrarlega og faglega, að færa leikskóla Flóahrepps, Krakkaborg, í húsnæði Flóaskóla grunnskóla Flóahrepps.

Á fundi sveitarstjórnar Flóahrepps í síðustu viku var samþykkt að efna til ráðgefandi skoðanakönnunar, samhliða Alþingiskosningunum 27. apríl n.k., meðal íbúa Flóahrepps, um framtíðarstaðsetningu leikskólans. 

Eins og stundum áður, á Föstudaginn langa, var farið í góðan útreiðartúr hér um Flóann í gær. Verðrið var frábært. Reyndar biðum við af okkur él sem gerði þegar lagt var af stað en það sem eftir lifði dagsins var rjómablíða.

Héðan fóru af stað upp úr hádegi, Hallfríður og Jón í Lyngholti, Stefán Ágúst og ég. Hér eru níu hross á járnum og  voru þau öll tekin með. Þegar áð var við Yrpholt komu þau feðgin í Egilsstaðakoti Einar og Halla ríðandi. Einar hélt áfram með okkur en Halla kvaddi og reið aftur heim í Kot.

Í Skyggnisholti var tekið á móti okkur með kaffi og súkkulaði út á hlaði. Ekki var síður tekið vel á móti okkur í Hófgerði og Dalbæ. En á þessum bæjum riðum við heim á hlað og hittum húsráðendur og áttum gott spjall við heimilisfólk í blíðunni

Það var að byrja að skyggja þegar við komum síðan í Egilsstaðakot. Þá höfðum við riðið góðan hring í Flóanum. Í Kotinu var sprett af og farið í kvöldmat hjá ElluVeigu. Þar var reyndar stoppað í góða stund og spjallað saman.

Það var svo á ellefta tímanum í gærkvöldi sem við riðum hingað í Kolsholt aftur. Nokkuð skuggsýnt var orðið en þó var norðurhimininn heiður og þar sást blika í stjörnur og norðurljós. Ljósin á bæjunum sáust um allan Flóann. Engin umferð var á vegunum fyrir utan einn bíl ( Sveinn Orri á Löduni ) sem kom upp Egilsstaðveginn.

Hjóðbært var í kvöldkyrrðinni. Fyrir utan hófadynin heyrðist öðru hvoru í áftinni á Villingaholtsvatni en þar bíður hún nú í hundraðavís að komast í nýgræðininn þegar byrjar að grænka. Í fjarska heyrðist einnig niður í Atlandshafinu þar sem það lemur suðurströnd landsins.
 
Hrossin voru nú orðin slök en samt viljug að komast heim. Þau sem vildu streða og jafnvel slást í upphafi ferðar runnu nú ljúf með slakan taum og nánast öll í einum takti. Við vorum sammála um að þetta væri hápunturinn á annars mjög góðri og skemmtilegri ferð.

Á miðvikudag var jafndægur að vori. Með hækkandi sól og meiri og lengri dagsbirtu verður tilveran bæði áhugaverðari og skemmtilegri. Það er alltaf tilhlökkunarefni að geta farið að takast á við vorverkin

Í nýliðinni viku var víða komið við. Á mánudagsmorguninn s.l. heimsótti sveitarstjórn Flóahrepps ásamt atvinnu- og umhverfisnefnd sveitarfélagsins Íslenska Gámafélagið í gömlu Áburðarverksmiðuna í Gufunesi. Þar var okkkur kynnt starfsemi félagsins í endurvinnslu- og endurnýtingarmálum.


Í flokkunarskemmuni í Gufunesi

Samningur Ísl. Gámafélagsins og Flóahrepps um sorphirðu og móttöku og meðferð á endurnýtanlegum úrgangi rennur út nú í sumar. Stefnt er að áframhaldandi samstarfi með nýjum samningi.

Seinnipartinn á mánudaginn renndum við Kolbrún til Njaðvíkur og heimsóttum Óla og Hönnu. Áttum þar góða sund með þeim m.a. buðu þau okkur út að borða á Kaffi Duus í Keflavík. Eftir að hafa gist hjá þeim í Stapakoti fór Óli með okkur í skoðunnarferð á þriðjudagmorguninn. Fórum við út í Garð og að Garðskagavita,um Sandgerði, Hvalsnes, Stafnes, Hafnir og að Reykjanesvita.


Þennan Geirfugl (t.v.) hitti ég við Reykjanesvita.  

Á leiðini heim seinnipartinn á þriðjudag stoppuðum við hjá Bödda og Guju í Hafnafirði. Þau buðu okkur einnig út að borða á Aski í Reykjavík. Eftir góðan mat og gott spjall með þeim var síðan haldið heim.

Á miðvikudagskvöldið var hér í sveit haldinn íbúafundur um skóla og frístundastefnu sveitarfélagsins. Unnið hefur verið að þessari stefnu í vetur og er sú vinna nú langt komin og er stefnt að þvi að hún verðri lögð fyrir sveitarstjórn til afgreiðslu nú í vor.

Á fimmtudagsmorgun byrjaði ég daginn, á eftir morgunverkunum, á að mæta á skipulagsnefndarfund á Laugarvatni. Seinnipartinn var svo fundur hér í Þingborg um málefnni Skólaskrifstofu Suðurlands. Á þennan fund mættu aðilar frá þeim sveitarfélögum sem standa að Skólaskrifstofunni fyrir utan Árborg.

Eins og kunnugt er þá hefur Sveitarfélagið Árborg ákveðið að hætta þátttöku í rekstri skrifstofunnar frá og með næstu áramótum. Sveitarfélögin sem eftir standa þurfa nú að bregðast við breyttum aðstæðum í ljósi þessarra ákvörðunnar.   

Sveitarfélögin í landinu héldu landsþing á föstudaginn var. Þar komu saman sveitarstjórnarmenn af öllu landinu og ræddu þau málefni sem helst brenna á. Fulltrúar voru mættir frá ölllum sveitarélögunum nema tveimur. Hátt á annað hundrað manns voru á þessu þingi sem hófst kl 9:30 og var lokið upp úr kl 16:00. Þá tók við snarpur aðalfundur Lánasjóðs sveitarfélaga ohf.  

Meðal umræðuefna voru vinnutímamál kennara, hagræðingaraðgerðir sveitarfélaga, rafræn stjórnsýsla og svæðasamvinna sveitarfélaga ásamt ýmsu fleira. Þetta mun hafa verið seinasta landsþing á þessu kjörtímabili en kosið verður til sveitarstjórna á næsta ári.

Nú líður senn að því að við verðum búinn að þreyja bæði þorrann og góuna þennan veturinn. Daginn er tekinn að lenga svo um munar og ekki laust við það að maður finnist vorið vera á næsta leiti. Í tilefni þess læt ég hér fylgja mynd sem Jón Karl Snorrason flugmaður og ljósmyndari tók hér yfir bænum um hásumar 2011.