Í síðasta mánuði ferðuðumst við austur á land. Við fórum 7 saman saman á tveimur bílum. Það voru ég og Kolbrún, systurnar í Lyngholti þær Kolbrún Katla og Ásta Björg, bræðurnir í Jaðarkoti þeir, Arnór Leví og Hrafnkell Hilmar  og svo hún móðir mín.

Ferðinni var heitið á ættarmót afkomenda afa míns og ömmu, (Aðalsteinn Eríksson f.31.01.1901 - d. 27.01.1990 og Bjarnveig Ingimundardóttir f. 31.10.1902 - d. 27.04.1992). sem haldið var á bænum Hafursá rétt við Hallormstaðaskóg.

Þetta var fjörmikil ferð eins og gefur að skilja þegar ferðst er með tápmiklu og hressu ungu fólki. Við lögðum af stað á fimmtudegi og gistum á Höfn, Eftir að hafa farið í sund á föstudagsmorgun á Höfn var ferðinni haldið áfram. Komið var að Hafursá einhvern tíman seinnipartinn. Vorum þar á ættarmótini fram á sunnudag. Þá var aftur keyrt á Höfn og gistum þar. Komum svo heim á mánudag.

Hluti af ferðafélögunum: bræður frá Jaðarkoti og systur frá Lyngholti.

Þessi ættarmót hafa nú síðustu áratugina verið haldin á þriggja ára fresti. Síðast vorum við í Reykjanesi við Ísafjarðardjúp sumarið 2013. Vestur í Djúp ()  Þessi ætt hefur þá tengingu nú við austurland að þangað flutti fyrir 50 árum frænka mín og hennar maður þá með eitt lítið barn. Nú í dag er þetta orðin fjölmenn fjölskylda sem telur þrjá ættliði.

Það voru eimitt þau sem skipulögðu ættarmótið að þessu sinni og tóku á móti okkur með miklum glæsibrag. Eins og alltaf á þessum samkomum skemmtu menn sér vel bæði börn og gamalmenni og allir sem eru þar á milli.

Að Hafursá

Það voru nú reyndar rifjuð upp önnur tenging þessarra ættar við austur land á ættarmótinu. En það var sagan af langalangalangafa mínum Páli Eiríkssyni (1783-1860) Lífsbarátta á 19. öld () og Draugagangur ()  Páll varð fyrir þeirri hræðilegu lífsreynslu að sonur hans hvarf á unglingsaldri og fannst aldrei. Páll, sem þá bjó í Öxnadal, taldi sig vita að nágranni sinn og vinnuveitandi piltsins hafi myrt hann.

Það fékkst nú aldrei sannað og að endingu fannst Páli Eiríksyni sér ekki lengur vært í Öxnadalum. Hann flutti þá með sina fjölskyldu austur á Hérað þar sem hann bjó til æfiloka.

Um síðustu helgi var svo aftur haldið á annað fjörugt og skemmtilegt ættarmót. En það var á svo kallað "Júllaramót" sem er ættarmót afkomenda tengdaforeldra minna.(Júlíus Sigmar Stefánsson f. 12.06.1912 - d. 7.10 1989 og Guðfinna Björg Þorsteinsdóttir f. 27.07. 1916 - d. 29. 05. 1984). Júllarar. ()  Þessi mót eru einnig haldin reglulega en að þessu sinni sérstaklega í ár til að minnast þess að nú í næstu vlku eru 100 ár frá fæðingu tengdamömmu.

Júllaramótið nú var í Stykkishólmi. Við mættum öll, allt mitt fólk úr Flóanum. Tókum á leigu stóran bústað í Helgafellsveitinni og dvöldum þar frá föstudegi til sunnudags. Við erum alls 17 og áttum góða helgi saman og með öðru frændfólki á frábæru Júllaramóti.

Öll saman komin í Helgafellssveitinni

Flestir héldu svo heim á leið á sunnudag en við Kolbrún og Aldís Tanja í Jaðarkoti bættum aðeins við ferðalagið. Við keyrðum norður í Skagafjörð og tókum okkur ýmislegt fyrir hendur og skoðuðum margt. Heimsóttum m.a. og dvöldum hjá frændfólki mínu í föðurætt sem þar býr.  Við skoðuðum einnig bílasafn og búmynjasafn. Við heimsóttum loðdýrabónda og fengum að sjá í minkahúsin hjá honum. Við fórum víða og sáum margt eins og tilheyrir á ferðalögum.

Við Aldís Tanja á heimleið vestur á Mýrum við Akraós

Ágætt var svo að koma heim aftur á miðvikudagskvöld.

Í dag er Flóahrepppur 10 ára. Þennan dag 12. júní 2006 fékk, þá nýkjörin sveitarstjórn í nýju sameinuðu sveitarfélagi hér í Flóanum, umboð sitt. Hún kom saman til fyrsta fundar þennan dag fyrir 10 árum. Meðal verkefna þess fundar var að ákveða nafn á þessu nýja sveitarfélagi og kjósa oddvita sveitarstjórnar. Einng samþykkti þessi fundur m.a.að auglýsa til umsóknar stöðu sveitarstjóra hjá sveitarfélaginu.

Samþykkt var samhljóða að sveitarfélagið ætti að heita Flóahreppur. Samhliða sveitarstjórnar kosningunum, hálfum mánuði fyrr, fór fram skoðannakönnun meðal íbúa í sveitinni um nafn á þetta nýja sveitarfélag. Nokkur meirihluti, þeirra sem þátttóku, völdu nafnið Flóahreppur.

Á þessum fyrsta fundi var ég kosinn oddviti sveitarstjórnar Flóahrepps. Það hafði eins og gefur að skilja nokkrar breytingar á mínum daglegu störfum. Ég ákvað með litlum fyrirvara fyrir kosningarnar að gefa kost á mér í þetta. 

Ég var að vísu búinn að starfa með hópi fólks í sveitinni í nokkrar vikur að undirbúa framboð til sveitarstjórnar. Þessi hópur hafði það fyrst og fremst að leiðarljósi og virkja fólk almennt í sveitinni til þátttöku  í stjórnun og rekstur nýs sveitarfélags. Þetta var hópur sem fannst það ekki vænlegur kostur að aðeins einn framboðslisti  væri í kjöri sem yrði þá sjálfkjörinn.

Vitað var að fráfarandi sveitarstjórnir gömlu sveitarfélaganna hyggðust leggja fram sameiginlegan lista. Það fylgdi einnig sögunni að í þeim hópi var það talið vænlegast að sameinast um einn lista fyrir kosningar til að forðast einhverja flokkadrætti og sundrung í nýju sveitarfélagi áður en það yrði í raun til.

Þessu voru ekki allir sammála og því var farið í þá vinnu að kanna og undirbúa annað framboð. Kjósendur hefðu þá allavega einhvert val í kosningunum. Þau sem komu fyrst að máli við mig um að taka þátt í þessum undirbúningi voru þau hjón á Læk, Guðbjörg og Gauti heitinn. Þau komu hér til mín einn morguninn til að ræða þetta.

Í framhaldi af því fór ég að taka þátt í þessari vinnu sem aðalega gekk út á að skilgreina stefnu og markmið væntanlegs framboðs. Þetta varð fljótlega nokkuð álitlega stór hópur af áhugasömu fólki um málefni sveitarfélagsins. Ekki vorum við mjög upptekin af því framanaf, hvaða einstaklingar myndu skipa þennan lista.

Svo þegar fór að nálgast þann dag að skila þyrfti inn framboði til kjörstjórnar var ekki hjá því komist að fara að velta því fyrir sér. Búið var að vinna vel í málefnagrundvelli og mér fannst allt þetta fólk finna sameiginlegan grundvöll fyrir framboðinu. Ágætlega gekk að fá fólk til þess að taka sæti á framboðslistanum. 

Aðeins átti nú eftir að taka ákvörðun um hver myndi leiða listann og vera tilbúinn til þess að taka að sér stöðu oddvita ef listinn fengi meirihluta atkvæða. Þegar þarna var komið sögu var ég búinn að gefa kost á mér í eitthvað af efstu sætunum og taka þá sæti í nýrri sveitarstjórn ef listinn fengi fylgi. Á þeirri stundu hvarlaði ekki að mér að ég yrði oddvitaefni listans.

En það reyndist aðeins snúnara en ég reiknaði með að taka ákvörðun um hver ætti að leiða listann. Þegar á reyndi sýndist sitt hverjum í því efni og niðurstaða ekki augljós. Enginn í hópnum gerði tilkall til þess en vafalítið hefðu einhverjir fleiri en ég fengist til þess ef eftir því hefði verið leitað og samstað verið um.

Mér fannst ég hinsvegar nú verða þess áskynja að margir í hópnum höfðu af þessu aðeins áhyggur.  Nú var farið að nefna mitt nafn í þessu samhengi og eftir að hafa metið stöðuna svolítið í hópnum fór ég að taka alvarlega að skoða það. Mér fannst þessi vinna sem búin var að fara fram frábær og nú yrðu menn að axla ábyrð sína til að koma þessu í framkvæmd þ.e. leggja fram framboðslista.

Ég ræddi því þessa stöðu við mitt fólk hér heima. Ekki kom til greina að gefa kost á sér í þetta nema hafa fjölskylduna alla með sér. Þar skipti máli bæði búrreksturinn sem við stöndum saman að og svo bara fjölskyldan sjálf. Það var einnig alveg skýrt að minni hálfu að gera fyrirfram ráð fyrir þeim möguleika að framboðið gæti fengi meirihlutafylgi 

Ekki þurfti ég að ræða þetta lengi við mitt fólk. Öll sem eitt kvöttu þau mig til þess að gefa kost á mér í þetta ef ég hefði áhuga á og treysti mér til þess. Það varð því úr að ég gaf færi á því að ég tæki forystu sætið á listanum. Strax og ég hafði svarað þessu varð ég ekki var við annað í hópnum en einhugur væri um þá niðurstöðu.

Þegar kosningaúrslit lágu svo fyrir að kvöldi kjördags kom í ljós þetta framboð fékk 4 fulltrúa af 7 í sveitarstjórn en framboð  gömlu sveitarstjórnanna fékk 3 fulltrúa kjörna. Þessi 7 manna sveitarstjórn starfaði svo næstu 4 árin. 

Það er mitt mat að þetta var farsæl sveitarstjórn sem var nokkuð samheldin og samstíga í mörgum málum. Hún var málefnaleg í allri sinni vinnu og þó hún hafi þurft að fást við erfið og krefjandi verkefni og alls ekki alltaf sammála var ávalt unnið af heilindum af öllum sveitarstjórnarmönnum.

Fyrsta sveitarstjórnar Flóahrepps 2006-2010 . F.v. Björgvin Njáll Ingólfsson, Einar Helgi Haraldsson Guðmundur Stefánsson, Margrét Sigurðardóttir sveitarstjóri, Aðalsteinn Sveinsson, Jóhannes Hreiðar Símonarson, Guðbjörg Jónsdóttir og Valdimar Guðjónsson.